དཔལ་ས་སྐྱའི་མཐོ་རིམ་སློབ་གྲྭ་ཆེན་མོ།

མཁན་རབས་དང་པོ་མཁན་ཆེན་རྡོ་རྗེ་འཆང་ཨ་པད་རིན་པོ་ཆེ་མཆོག་ནི། ༡༩༢༧ ལོར་སྐུ་བལྟམས་པའི་ཚུལ་བསྟན། གཞོན་ནུའི་དུས་ནས་དམ་པའི་རིགས་སད་དེ་གསེར་ལྗོངས་ཆོས་གྲྭར་སྒྲིག་ཞུགས་མཛད། ཕྱི་ལོ་༡༩༣༤ ལོར་གསེར་ལྗོངས་དང་མི་རིང་བར་མདོ་གཞུང་གི་ཆུ་བོ་དལ་གྱིས་འབབ་པའི་ཕྱོགས་སུ། རྩ་ཐང་ཡངས་པ་ཞིག་གི་དཀྱིལ་དུ་ཨར་ལས་དང་རྒྱུན་གྱི་གསོལ་ཕོགས་བཅས་བོད་གཞུང་གི་སྦྱིན་བདག་མཛད་པ་ལྟར་རྡོ་རྗེ་འཆང་དངོས་འཇམ་རྒྱལ་རིན་པོ་ཆེས་སྡེ་སྣོད་ཀྱི་ཆོས་གྲྭ་ཆེན་པོ་བཙུགས། འཇམ་མགོན་གྲུབ་པའི་དགའ་ཚལ་ཞེས་པའི་མཚན་བཏགས། ཡིག་ཆ་ཀུན་མཁྱེན་གྱི་གསུང་ལ་རྒྱབ་རྟེན་གཡག་རོང་གི་གསུང་རྣམས་ཡིན་པའི་སློབ་ཚན་གཏན་ལ་ཕབ་པོ། དེའི་སྐབས་ཤིག་ལ་མཁན་ཆེན་མཆོག་ཉིད་དགུང་གྲངས་བཅུ་ཙམ་བཞེས་པའི་ཚེ། བླ་མ་རྡོ་རྗེ་འཆང་འཇམ་རྒྱལ་རིན་པོ་ཆེའི་ཞལ་སྔ་ནས། བྱང་ཆུབ་སེམས་པའི་སྤྱོད་པ་ལ་འཇུག་པ་གསན། དེ་ནས་རིམ་བཞིན་འཇམ་མགོན་གྲུབ་པའི་དགའ་ཚལ་ཞེས་པའི་མཚན་གྱིས་བརྗིད་པའི་ཆོས་གྲྭ་ཆེན་པོར་ཕེབས་ཏེ། མཁན་ཆེན་འཇམ་དབྱངས་དྲི་མེད་མཆོག་དང་། ལྔ་རིག་སྨྲ་བའི་མཁས་གྲུབ་སེངྒེ་མཆོག་གི་ཞལ་སྔ་ནས་དང་། མཁན་ཆེན་འཇམ་དབྱངས་དགེ་ལེགས་ཞབས་དང་། ལེགས་བཤད་སྨྲ་བའི་གཙུག་རྒྱན་མཁན་ཆེན་བློ་གྲོས་སོགས་བསྟེན་ཏེ། ཕར་ཚད་གཙོ་བོར་གྱུར་བའི་པོད་ཆེན་དྲུག་དང་དེའི་ཡན་ལག་རིག་གནས་དང་བཅས་པར་གསན་བསམ་མཛད་དེ་མཁས་པའི་རྩེར་སོན། དེ་མཚམས་རྫོང་སར་ཁམས་བྱེའི་ཆོས་གྲྭར་ཡང་ཕེབས་ཏེ་ལོ་ཤས་རིང་མཁན་ཆེན་ཐུབ་བསྟན་རྒྱལ་མཚན་དང་། མཁན་ཆེན་དམ་ཆོས་ལ་སོགས་པའི་སྐུ་མདུན་ནས་མདོ་ཕྱོགས་ལ་གསན་བསམ་མཐར་ཕྱིན་མཛད། ཨ་འཇམ་རྡོ་རྗེ་འཆང་ལས་བསྙེན་པ་རྫོགས། འཇམ་མགོན་བླ་མ་ཆོས་ཀྱི་བློ་གྲོས་དང་། རྡོ་རྗེ་འཆང་ཨ་འཇམ་རིན་པོ་ཆེའི་སྐུ་གམ་ནས་ཟབ་མོ་སྔགས་ལ་གསན་བསམ་མཐའ་རུ་ཕྱིན་པ་མཛད། བགྲང་བྱ་ཉེར་ལྔ་བཞེས་པའི་ཚེ་གསེར་ལྗོངས་ཆོས་གྲྭའི་མཁན་ཁྲིར་ཕེབས། དེ་མཚམས་དབུས་གཙང་ཆོས་ཀྱི་ཞིང་སར་བཀྲ་ཤིས་རེ་ཁ་བཀོད་དེ་གདན་ས་ཆེན་པོ་ངོར་ཨེ་ཝཾ་ཆོས་སྡེའི་བཤད་གྲྭའི་མཁན་པོ་མཛད། ལྷ་སར་འཇམ་དབྱངས་ཆོས་ཀྱི་བློ་གྲོས་མཆོག་གིས་རྫོང་སར་ཁམས་བྱེའི་ཆོས་གྲྭ་ཆེན་པོའི་མཁན་རབས་བཅུ་གཉིས་པའི་ཁྲི་ལ་མངའ་གསོལ་མཛད། གསེར་ལྗོངས་འཇམ་མགོན་གྲུབ་པའི་དགའ་ཚལ་དུ་སློབ་གཉེར་གནང་སྟེ་ཐོན་པའི་མཁས་ཆེན་ཆོས་གྲོགས་ཀྱང་། དཔེར་ན། གསེར་ལྗོངས་མཁན་ཆེན་ངག་དབང་མཁྱེན་བརྩེ་སོགས་དང་། འདམ་ཐོག་མཁན་ཆེན་ངག་དབང་ཡོན་ཏན་དང་། དུང་མདོ་མཁན་ཆེན་ཡེ་ཤེས་ཕུན་ཚོགས། ཏ་ཟིག་མཛོ་འཇང་གཉིས་ཀྱི་མཁན་ཆེན་དང་། སྤོ་ལུ་མཁན་ཆེན་ཨོ་རྒྱན་དང། ཐང་སྐྱ་ནག་མི་མཁན་ཆེན་དང་། ཡངས་ཅན་མཁན་ཆེན་བློ་གྲོས་བཟང་པོ་དང་། མཁས་དབང་ནམ་མཁའི་ནོར་བུ་སོགས་ཡིན། དུས་འགྱུར་སྐབས་རྒྱ་གར་དུ་ཕེབས་སྟེ་འཇམ་མགོན་བླ་མ་ཁྲི་ཆེན་རྡོ་རྗེ་འཆང་གི་ཡོངས་འཛིན་མཛད། ༧སྐྱབས་མཆོག་འཁོར་ལོའི་མགོན་པོ་རྗེ་རྡོ་རྗེ་འཆང་དཔལ་ས་སྐྱ་པ་ཆེན་པོའི་བཀའ་དགོངས་བཞིན་དཔལ་ས་སྐྱ་པའི་བསྟན་གཞི་ས་སྐྱ་མཐོ་སློབ་བཙུགས། དམའ་དགེ་ཚུལ་ཀཱ་རི་ཀ་ནས་མཐོ་རྒྱུད་རྒྱལ་དགེས་པ་རྡོ་རྗེ་བར་གྱི་ཆོས་འཁོར་ཤིན་ཏུ་རྒྱ་ཆེན་བསྐོར་། དེའི་རྒྱུ་ཅན་ལས་རྗེ་བཙུན་ས་སྐྱ་པའི་ཐུན་མོང་མ་ཡིན་པའི་མདོ་སྔགས་ཀྱི་བཤད་རྒྱུན་རྐང་བརྟན་པར་ཚུགས། གྲུབ་མཐའི་གནད་ཤེས་པའི་ཞལ་སློབ་མང་དུ་བྱོན། མདོར་ན་བསྟན་པ་སླར་གསོའི་སྐབས་འདིར་རྗེ་བཙུན་ས་སྐྱ་པའི་མདོ་སྔགས་ཀྱི་བཤད་རྒྱུན་རྐང་བརྟན་པོར་ཚུགས་ཐུབ་པར་བྱུང་བའི་བཀའ་དྲིན་ནི། བདག་ཅག་ས་སྐྱ་པ་རྣམས་ཀྱི་བསྐལ་བ་ནས་བསྐལ་བའི་བར་གཞལ་དཀའ་བ་ཡིན་ནོ། །གོང་ཞུས་བསྟན་པའི་བྱ་བ་ལེགས་གྲུབ་ལ་ཐུགས་རང་ཤིང་མཉེས་ཏེ་མཁན་ཆེན་རང་གི་ཞལ་སྔ་ནས་འདི་ལྟར་། སློབ་གྲོགས་གྲས་བོད་ཀྱི་ཕྱི་ལོགས་སུ་བཞུགས་པ་མཁན་ཆེན་བློ་གྲོས་བཟང་པོ་དང་། མཁས་དབང་ནམ་མཁའི་ནོར་བུ་དང་། གུས་པ་རྣམས་ཐོག་མ་རང་ནས་སློབ་གཉེར་ཡུན་རིང་བྱས་། གྲུབ་འབྲས་ཀྱང་ཡག་པོ་ཡོད་ཅེས་གསུངས་སོ། །མཐར་རྟག་འཛིན་ཅན་རྣམས་ཆོས་ལ་བསྐུལ་ཕྱིར། ཕྱི་ལོ་༢༠༡༠ ཕྱི་ཟླ་༡༢ པའི་ཚེས་༢༨ ཉིན་དགོངས་པ་ཆོས་དབྱིངས་སུ་བསྡུ་བའི་ཚུལ་བསྟན་ཏོ།། ཁྲི་ལོ་ནི།༡༩༧༢ ནས་༡༩༨༤ བར་ཡིན་ལ། གསུང་རྩོམ་ནི་མདོ་སྔགས་ཀྱི་དཀའ་བའི་གནད་བགྲོད་བའི་དགག་སྒྲུབ་ཀྱི་གཞུང་མང་པོ་ཡོད་ཀྱང་པར་བསྐྲུན་དུ་དགོངས་འཁྲོལ་ཐོབ་པ་ནི། དག་ལྡན་གྱི་མཆན་འགྲེལ་རྒྱུད་དོན་གསལ་པའི་སྤྱན་ཤེལ་ཉག་གཅིག་ཡིན་ལ། དེ་བཞིན་ཟབ་གསང་གསུང་གི་བདུད་རྩི་མཐའ་ཡས་པ་ལས་སྒྲ་འཛིན་དུ་ཚུད་པ་རྣམས་ལས་ཡིག་ཐོག་ཏུ་ཕབ་སྟེ་པར་སྐྲུན་ཟིན་པ་ནི། ཐེག་པ་ཆེན་པོའི་བསྒོམ་ཁྲིད། ཐུབ་པ་དགོངས་གསལ་དང་། བཟང་སྤྱོད། ཞེན་པ་བཞི་བྲལ་སོགས་ཀྱི་བཀའ་ཁྲིད་སྒྲ་ཕབ་མ་སོགས་གསུང་འབུམ་པོད་བཞིར་ཙམ་ཡིན་ལ་དེ་དག་ལས་ཐེག་པ་ཆེན་ཆེན་པོའི་བསྒོམ་ཁྲིད་སོགས་འགའ་ཞིག་རྒྱ་ཡིག་སོགས་སུའང་བསྒྱུར་ཟིན་པ་ཡིན་ནོ།།