དཔལ་ས་སྐྱའི་མཐོ་རིམ་སློབ་གྲྭ་ཆེན་མོ།

མཁན་པོ་ཚུལ་ཁྲིམས་བསྟན་དར་མཆོག་ནི། ༡༩༧༦ ལོར་འཁྲུངས་ཤིང་། ༡༩༨༥ ལོར་བླ་མ་བློ་བཟང་བྱམས་པའི་སྐུ་མདུན་ནས་རབ་ཏུ་བྱུང་ཞིང་། མི་འགྱུར་བུ་དགོན་དཔལ་ལྡན་ཞི་བ་དགོན་དུ་འཛུལ་ཞུགས་ཀྱིས་མཐོང་བརྒྱུད་ཕྱག་ལེན་དང་བོད་ཀྱི་བརྡ་སྤྲོད་སོགས་ལ་སྦྱངས་པ་མཛད། ༡༩༩༡ ལོར་མ་དགོན་བཤད་གྲྭ་ཐུབ་བསྟན་རྣམ་རྒྱལ་གླིང་དུ་གཞུང་ལུགས་རབ་འབྱམས་ལ་ཐོས་བསམ་བྱེད་པའི་སྐལ་བཟང་མངོན་དུ་བྱས། དེར་ལོ་གསུམ་བཞུགས་རྗེས་༡༩༩༤ ལོར་ས་སྐྱ་མཐོ་སློབ་ཏུ་ཕེབས་ནས་བདེ་བར་གཤེགས་པ་མཁན་པོ་མིག་དམར་ཚེ་རིང་མཆོག་གི་མདུན་ནས་མདོ་སྔགས་རབ་འབྱམས་ལ་སྦྱངས་པ་མཛད་དེ། ༢༠༠༠ ལོར་འཁོན་གདུང་སྐུ་བགྲེས་རིན་པོ་ཆེ་དང་ལྷན་དུ་སློབ་མཐར་སོན་ཅིང་བཀའ་བཅུ་པའི་མཚན་གནས་བཞེས། ༢༠༡༣ ལོར་མཁན་ཆེན་བསོད་ནམས་རྒྱ་མཚོ་མཆོག་གིས་གསོལ་བ་བཏབ་པ་ལྟར་༧སྐྱབས་མགོན་༧གོང་མ་ཁྲི་ཆེན་རྡོ་རྗེ་འཆང་ཆེན་པོ་མཆོག་ནས་འདི་ག་ས་སྐྱ་མཐོ་སློབ་ཀྱི་དཔལ་འབྱོར་འཚོལ་སྒྲུབ་ཀྱི་ཐད་ཐུགས་འགན་ཁུར་དགོས་པའི་བཀའ་ལུང་ཕེབས་པ་བཞིན་ད་ཆ་འདི་གའི་ཕྱག་མཛོད་ཀྱི་འགན་བཞེས་མུས་བཅས་སོ།།