དཔལ་ས་སྐྱའི་མཐོ་རིམ་སློབ་གྲྭ་ཆེན་མོ།

དཔལ་ལྡན་ས་སྐྱ་མཐོ་རིམ་སློབ་གྲྭའི་ལོ་གཅིག་གི་འཆར་ཅན་གྱི་ལས་རིམ་དང་ཉིན་གཅིག་གི་རྒྱུན་སྤྱོད་ནི།ལོ་ལྟར་ཕྱི་ཟླ་༧ པའི་ཚེས་༡༥ ནས་བཤད་གྲྭ་ཚོགས་ཏེ། བསྐང་གསོ་རྒྱས་པ་དང་འབྲེལ་གུར་ལྷ་བརྒྱད་ཀྱི་འཕྲིན་བཅོལ་གཏུམ་ཆེན་མ་འབུམ་ཐེར་གྲངས་གསོག་གྲུབ་རྗེས། ཉིན་ལྟར་ཞོགས་པ་ཆུ་ཚོད་༥:༤༥ སྔོན་བཞེང་ཐུབ་གནང་དགོས། ཆུ་ཚོད་༦:༠༠ ནས་སྐར་མ་བཞི་ཅུ་ཞེ་ལྔ་ཙམ་གྱི་རིང་བླ་སྤྲུལ་དགེ་འདུན་པ་ཡོངས་ནས་གཙུག་ལག་ཁང་དུ་རྒྱུན་ཆགས་གསུམ་པ་དང་འབྲེལ་བླ་མ་རྣམས་ཀྱི་ཞབས་རིམ་དང་ཤི་གསོན་སྦྱིན་བདག་རྣམས་ཀྱི་ཆེད་དུ་བླ་མ་རྣམ་པའི་ཞབས་བརྟན་དང་། བར་བསམ་སྒྲོལ་གསུམ། བཟང་སྤྱོད་སྨོན་ལམ་སོགས་གསུང་གི་ཡོད། ཞོགས་ཚོགས་གྲོལ་བ་ཞོགས་ཇའི་ཆེད་དུ་ཆུ་ཚོད་༧:༠༠ བར་བར་སེང་། ཆུ་ཚོད་ ༨:༠༠ ནས་༩:༣༠ བར་འཛིན་གྲྭ་སོ་སོའི་དཔེ་ཁྲིད། དེ་ནས་གསོལ་ཇའི་བར་གསེང་ཆུ་ཚོད་ཕྱེད་ཀ  ཆུ་ཚོད་༡༠:༠༠ ནས་ ༡༢:༠༠ བར་རང་སྦྱོང་། དེ་ནས་ཉིན་གུང་གི་ཞལ་ལག་དང་ཆུ་ཚོད་༡:༣༠ བར་བར་སེང། ཆུ་ཚོད་༡:༣༠ ནས་ཆུ་ཚོད་༣:༠༠ བར་བཀའ་བཅུ་པ་དང་སློབ་དཔོན་རྣམས་ལ་དབྱིན་ཇིའི་འཛིན་གྲྭ་དང། དེ་མིན་རྣམས་རང་སྦྱོང་། དེ་ནས་གསོལ་ཇའི་བར་སེང་ཆུ་ཚོད་ཕྱེད། ཆུ་ཚོད་༣:༣༠  ནས་༤:༣༠ བར་སྐྱོར་ཁྲིད། ཆུ་ཚོད་༤:༣༠  ནས་ཆུ་ཚོད་༦:༠༠ བར་ཆོས་ར། དེ་ནས་ཕྱི་དྲོ་ཞལ་ལག་དང་ཆུ་ཚོད་༧:༠༠ བར་བར་སེང་། ཆུ་ཚོད་༧:༠༠ ནས་༨:༡༥ བར་རང་སྦྱོང་། དེ་ནས་གསོལ་ཇའི་བར་སེང་སྐར་མ་བཅོ་ལྔ། ཆུ་ཚོད་༨:༣༠ ནས་༩:༣༠ བར་ཆོས་ར་དང་། ཆུ་ཚོད་༡༠:༤༥ ནས་སྤྱིར་བཏང་གི་ཆ་ནས་གཟིགས་མལ་ལ་ཕེབས་དགོས།

 

དེ་མིན་སྟོན་པའི་དུས་ཆེན་རྣམ་བཞི་དང་རྗེ་བཙུན་གོང་མ་རྣམ་ལྔའི་འདས་མཆོད་ཀྱིས་མཚོན་པའི་དུས་ཆེན་ཁག་ཚོགས་མཆོད་ལ་སོགས་པའི་ཆོས་ཕྱོགས་ཀྱི་བྱེད་སྒོས་སྲུང་རྩི་ཞུ་བ་དང། ༸གོང་ས་༸སྐྱབས་མགོན་ཆེན་པོ་མཆོག་དང་། ༧སྐྱབས་མགོན༧གོང་མ་ཁྲི་ཆེན་རྡོ་རྗེ་འཆང་མཆོག་གི་འཁྲུངས་སྐར་ལ་ཞོགས་པ་ཚེ་ལྷ་རྣམ་གསུམ་གྱི་ཆོ་ག་གསུངས་གནང་ནས་དེ་རྗེས་སྤྲོ་སྐྱིད་གཏོང་། དེ་བཞིན་ཟླ་རེ་བཞིན་ཉེར་དགུ་ལ་གཙུག་ལག་ཁང་དུ་སྲུང་མའི་བསྐང་འཕྲིན་རྒྱས་པ་འཚོག་ཡ་དང་། རེ་འགའ་འཇམ་དབྱངས་ལྷ་ཁང་དང་ས་པཎ་ལྷ་ཁང་ནང་སྒྲོལ་ཆོག་དང་ཚེ་ཆོག སྨན་ཆོག རྒྱལ་བཞི་དང་བདུད་ཟློག་སོགས་སྦྱིན་བདག་རྣམ་པའི་རེ་ལྟོས་བཞིན་འཚོག་དགོས། ཕྱི་ཟླ་༡༠ པའི་ནང་ཉིན་ལྔའི་རིང་ལོ་འཁོར་སྤྲོ་སྐྱིད་ཆེན་མོ། ཕྱི་ཟླ་༡༢ པར་ས་སྐྱ་སྨོན་ལམ་ཆེན་མོ་ཚོགས་པར་ངེས་ཕེབས་དགོས་པས་དེའི་རིང་དང་། བོད་ཀྱི་ལོ་གསར་སྐབས་སུ་ཉིན་འགའི་རིང་དཔེ་ཁྲིད་མཚམས་འཇོགས་བྱེད་པ་མ་གཏོགས་དེ་མིན་ཕྱི་ཟླ་༧ པའི་ཚེས་༢༡ ཙམ་ནས་སང་ལོའི་ཟླ་༤ པའི་༡༥ བར་ཉིན་ལྟར་འཛིན་གྲྭ་ཆད་མེད་འགྲོ་ཡི་ཡོད་ལ། ཕྱི་ཟླ་༤ པའི་ཚེས་༡༥ ནས་ཉིན་བཅུ་ལྷག་ཙམ་གྱི་རིང་ཡིག་ཚད་རང་སྦྱོང་དང་། ཕྱི་ཚེས་ཉེར་བདུན་ཉེར་བརྒྱད་ཙམ་ལ་ཉིན་གཉིས་ཀྱི་རིང་ལོ་འཁོར་ཡིག་རྒྱུགས་ཆེན་མོ་བཏང་སྟེ། ཕྱི་ཟླ་༥ པའི་ཚེས་༡ ནས་ཕྱི་ཟླ་༧ པའི་ཚེས་༡༥ བར་དབྱར་ཁའི་གུང་སེང་ཆེན་མོ་གཏོང་བཞིན་པ་བཅས་ནི་འཆར་ཅན་ཡིན་ལ། ལས་རིམ་ཆེ་ཁག་སོ་སོའི་གསལ་བཤད་དང་བྱེད་སྒོ་དམིགས་བསལ་བའི་གནས་ཚུལ་སོགས་ནི་དུས་ཐོག་ཏུ་མཁོ་གཏོང་གནང་རྒྱུ་ཡིན་པས་འདིར་མ་སྤྲོས་སོ།།